¿Por qué facese sociu de HEF?
Difundir y deprender esperantu, la llingua internacional, paga la pena. Ye un muérganu de comunicación vivu, con una amplia comunidá de falantes y un apreciable patrimoniu cultural. Ye un medio d'entendimientu ente persones de cultures, oríxenes o estaos estremaos, que crea llazos más allá de llendes y divisiones de toa mena.
Sicasí, el nivel de conocencia sobre l'esperantu, les sos posibilidaes y la so realidá, ye tovía demasiao baxu. Tampoco'l númberu de falantes, magar que ye mayor de lo que percibe la opinión pública, ye tan grande como cabría desear. Por estes razones, la difusión del idioma, la conocencia de la so realidá y el convencimientu sobre les sos bondaes ye una xera tovía imprescindible.
Estes xeres –informacón, difusión, convencimientu– son les que la Federación Española d'Esperantu (Hispana Esperanto-Federacio – HEF) tien como oxetivos básicos de la so actividá. Al facete sociu de HEF contribuyes a estes metes y, d'esi mou, sofites la difusión de la llingua internacional y los sos ideales.
HEF ye la principal organización esperantista del Estáu español. Ta formada por asociaciones y clubes llocales y por socios individuales. Ye neutral y nun privilexa nenguna orientación política o ideolóxica y namás se guía pol respetu a los drechos humanos básicos y pola defensa de la comunicación internacional. Cualquier persona pue asociase, siempres qu'amuese'l so compromisu pol idioma. HEF respeta y favorez la pluralidá de los sos socios.
La Federación forma parte de l'Asociación Universal d'Esperantu. D'esta manera, ser sociu de HEF supón al mesmu tiempu ser miembru d'esta organización internacional y contribuir a la difusión del esperantu a nivel mundial.
Los socios de HEF tienen el drechu de participar na vida interna de l'asociación, fixar los sos oxetivos, escoyer a la direutiva, proponer iniciatives y campañes. Amás reciben un Boletín trimestral y pueden participar nos foros internos.
Los socios de HEF reciben rebaxes nes cuotes pa los alcuentros organizaos y patrocinaos pola asociación y gocien amás de precios especiales nos materiales que HEF tien en venta.
La Federación xestiona tamién el dominio d'Internet http://www.esperanto.es, disponible en castellán, esperantu y otres llingües del estáu. Dispón d'una oficina en Madrid con una biblioteca de más de 3500 exemplares de llibros y otros materiales al algame de los socios. La biblioteca cunta con una páxina web propia (http://www.esperanto.es/biblioteko), onde s'agospia tamién la “Bitoteko” (http://bitoteko.esperanto.es), el nuestru repositorio dixital con materiales históricos, munchos de gran valir.
Dacuando HEF edita material en o sobre l'esperantu. La promoción del valir de la cultura n'esperantu y tamién la difusión de la cultura española a traviés d'esti idioma atópense ente los oxetivos de la organización.
Los socios menores de 30 años son al mesmu tiempo de la Sociedá Xuvenil Esperantista Española (Hispana Esperantista Junulara Societo – HEJS).
Xúnite a nosotros. Enllena'l formulariu de soscripción. Y si quies conocer otres formes de collaborar coles nuestres actividaes o de sofitar los nuestros oxetivos, nun duldes en contactanos na direición Esta dirección de correo electrónico está protegida contra spambots. Necesita activar JavaScript para visualizarla..
LA ANTAŬENIGO DE ESPERANTO ESTAS NIA CELO