¿Cómo collaborar con HEF?
La Federación Española d'Esperantu (Hispana Esperanto-Federacio – HEF) ye una asociación col oxetivu principal de promover la información y la conocencia de la llingua internacional esperantu y de facilitar el so deprendimientu y la so difusión.
Si tas lleendo esti testu, confiamos en que coincidas con nosotros en que difundir y deprender l'esperantu paga la pena. Ye un muérganu de comunicación vivu, con una amplia comunidá de falantes y un apreciable patrimoniu cultural. Ye un medio d'entendimientu ente persones de cultures, oríxenes o países estremaos, que crea llazos más allá de llendes y divisiones de toa mena.
Tanto si yá lu fales como si tas nuna fase inicial o pensando en deprendelu, convidámoste a que collabores con nosotros na so difusión, a ayudar pa qu'algame una base de falantes más sólida tovía y a incrementar la so cultura y les sos posibilidaes d'usu.
HEF ta formada esclusivamente por voluntarios, miembros individuales o bien de los grupos asociaos. Nin los socios nin la direutiva se dediquen profesionalmente a esti llabor y poro cualquier collaboración ye bienvenida.
FAITE SOCIU DE LA FEDERACIÓN
Al facete sociu de la Federación Española d'Esperantu contribuyes a estos oxetivos básicos y asina sofites la difusión d'una llingua internacional y de los sos ideales.
HEF ye la principal organización esperantista del Estáu español. Ye neutral y nun privilexa nenguna orientación política o ideolóxica y namás se guía pol respetu a los drechos humanos básicos y pola defensa de la comunicación internacional. Cualquier persona pue asociase, siempres qu'amuese'l so compromisu pol idioma. HEF respeta y favorez la pluralidá de los sos socios.
La Federación forma parte de l'Asociación Universal d'Esperantu. D'esta manera, ser sociu de HEF supón al mesmu tiempu ser miembru d'esta organización internacional y contribuir a la difusión del esperantu a nivel mundial.
Amás, los miembros de HEF gocien de delles ventayes nes actividaes de l'asociación, de les que pues informate nuna fueya aparte.
Pa facete sociu de HEF, enllena'l formulariu de soscripción y únvialu a Esta dirección de correo electrónico está protegida contra spambots. Necesita activar JavaScript para visualizarla.
COLLABORA NES NUESTRES INICIATIVES
HEF organiza campañes y desendolca iniciatives pa difundir la llingua esperantu. Per exemplu, nel 2012 organizamos una campaña pa conmemorar el 125u aniversariu de l'aparición del primer llibru que presentaba esti idioma. Toles aiciones tan organizaes y desendolcaes por voluntarios y l'asociación aceuta y agradez cualquier iniciativa y collaboración de los falantes del idioma y los sos simpatizantes.
Si domines dalgún ámbitu d'especialización, como l'enseñu de llingües, les rellaciones col públicu o los medios de comunicación, la traducción, informática y Internet o cualquier otra, taremos encantaos de cuntar cola to contribución. Les simples ganes d'echar un gabitu tamién nos valen.
Si quies collaborar o si desees proponer iniciatives, nun duldes n'escribinos. Tamién pues apuntate a los foros de los que disponemos y de los que t'informaremos individualmente.
PIDI LOS NUESTROS MATERIALES
Dacuando la Federación crea y edita material pa la venta. Tamién distribuyimos materiales editaos pola Fundación Esperanto o de los clubes y asociaciones llocales, amás de llibros y material gráficu y audiovisual pa deprender la llingua.
Esti serviciu ye mui modestu, pero nun duldes en pidinos un catálogu o información sobre otros sitios onde puen mercase estos materiales.
Tamién pues abonate al nuestru Boletín trimestral, que contién información sobre les nuestres actividaes y sobre l'actualidá del esperantu y ta escritu dafechu nesta llingua. Los socios recíbenlu de baldre pero tamién ye posible mercalu o abonase a él.
FAI UN DONATIVU
Pues facer una donación económica a la Federación. Esti dineru será emplegáu pa los oxetivos xenerales de l'asociación o pue dedicase a un serviciu o una campaña específicos qu'escueyas. En cualquier casu, usaráse esclusivamente n'actividaes a favor del esperantu.
Pue donase:
La Federación Española d'Esperantu ye una asociación d'utilidá pública d'alcuerdu coles lleis españoles y les donaciones que recibe gocien de ventayes fiscales.
DIFUNDE LES NUESTRES ACTIVIDAES
Difunde l'esperantu y da a conocer el llabor de la Federación. Disponemos de folletos y materiales informativos que taremos encantaos de facete llegar pa les tos xeres d'información y publicidá. HEF cuenta amás de material estremáu pa usar n'esposiciones, conferencies y otres víes de difusión. Nun duldes en solicitar el material o más información a Esta dirección de correo electrónico está protegida contra spambots. Necesita activar JavaScript para visualizarla..
Publicita la nuestra páxina web http://www.esperanto.es. Tamién los nuestros espacioes nes redes sociales (Facebook, Twitter, Google+, o'l nuestru canal en Youtube) merecen siguise y difundise.
Informa a los tos amigos, círculos sociales y tamién a otros simpatizantes del idioma o a falantes que nun mantengan una rellación constante col movimientu organizáu pero que podíen tar interesaos na difusión y la conocencia del esperantu.
Nun duldes tampoco en llamanos o escribinos si simplemente quies saber dalgo más sobre la nuestra asociación o ufrir la to ayuda. Taremos encantaos de cuntar cola to collaboración.
LA ANTAŬENIGO DE ESPERANTO ESTAS NIA CELO