Cómo colaborar con HEF?
A Federación Española de Esperanto (Hispana Esperanto-Federacio – HEF) ye una asoziazión cualo suyo ochetibo alazetal ye promober a informazión e lo conoiximiento d'a luenga internazional esperanto, armanir o suyo aprendizache e la suya espardidura.
Si yes leyendo iste testo, confitamos en que coinzidas con nusatros en que espardir e aprender o esperanto merixe la pena. Ye un organo de comunicazión bibo, con una ampla comunidá de fablans e un apreziable patrimonio cultural. Ye un meyo d'entendimiento entre presonas de diferiéns culturas, oríchens u estaus, que creya binclos per denzima de mugas e dibisións de tot tipo.
Tanto si ya lo fablas, como si yes en un ran inizial u yes pensando en aprender-lo, te combidamos a que colabores con nusatros en a suya espardidura, en aduyar a que prenga unos alazez de fablans encara más firmes e en incrementar a suya cultura y as suyas posibilidaz d'emplego.
HEF ye formada esclusibamén per boluntarios, a nibel endibidual u como miembros d'as collas asoziadas. Ni os sozios ni a direutiba se i dedican profesionalmén a ista labor, e per tanto cualsiquier colaborazión ye biemplegada.
FE-TE MIEMBRO D'A FEDERAZIÓN
En fer-te miembro d'a Federación Española de Esperanto contrebuyes a istos ochetibos alazetals e d'ista traza refirmas a espardidura d'a luenga internazional e los ideyals suyos.
HEF ye la prenzipal organizazión esperantista a nibel d'o Estau Español. Ye formada per asoziazións e clubs locals, e tamién en forman parti miembros endibiduals.
Ye una asoziazión neutral, que no pribilechia garra orientazión pulitica u ideolochica, e nomás se guía per o respeto a os Dreitos Humans alazetals e per a esfensa d'a comunicazión internazional. Cualsiquier presona puede conduzir-se, siempre que amostre o suyo compromís per a luenga. HEF respeta e faborexe a pluralidá d'os miembros suyos.
A Federación forma parti de l'Asoziazión Unibersal d'Esperanto. D'ista manera, estar miembro de HEF suposa a o mesmo tiempo estar miembro d'ista organizazión internazional, e contrebuyir a la espardidura d'o esperanto a nibel mundial.
Antimás, os miembros de HEF gozan de bellos abantallas en as autibidaz de l'asoziazión, d'as que puedes informar-te en una fuella antiparti.
Ta fer-se sozio de HEF, imple o formulario de conduzión e nimbía-lo ta Esta dirección de correo electrónico está protegida contra spambots. Necesita activar JavaScript para visualizarla.
COLABORA EN AS NUESTRAS INIZIATIBAS
HEF organiza campañas e desembolica iniziatibas ta espardir a luenga esperanto. Per exemplo, en o 2012 organizemos una campaña ta remerar o 125 cabodaño d'a amanixedura d'o primer libro que presentaba iste idioma. Todas as azions son organizatas e desembolicatas per boluntarios, e l'asoziazión azeuta e agradexe cualsiquier iniziatiba e colaborazión d'os fablans d'o idioma u os suyos simpatizans.
Si dominas bella demba d'espezializazión, como l'amostranza de luengas, relazión con o publico u los meyos de comunicazión, traduzión, informatica e Internet u cualsiquier atra, seremos encantatos de contar con a tuya contribuzión. Pero as simples ganas de chitar una man mos balen.
Si quiers colaborar, u si deseyas proposar iniziatibas, no dandalíes en escribir-mos. Tamién puedes apuntar-te ta las rufiertas d'as que disposamos, e d'as que te informaremos endibidualmén.
MERCA LOS NUESTROS MATERIALS
Á begadas, a Federación creya e edita material ta la suya benda. Tamién distribuyimos materials editatos d'a Fundación Esperanto u d'os clubs e asoziazións locals, antimás de libros e material grafico e audiobisual ta aprender a luenga.
O Serbizio ye muito modesto, pero no dandalíes en demandar-mos un catalogo u informazión sobre atros puestos ande pueden alquirir-se istos materials.
Tamién puedes conduzir-te á nuestro Boletín cuatrimestral, con informazións sobre as nuestras autibidaz e sobre l'autualidá d'o esperanto, escrito de tot en iste idioma. Os sozios lo recullen de gufaña, pero ye posible alquirir-lo u conduzir-se a el.
FÉ UN DONATIBO
Puedes fer una donazión economica a la Federación. Iste dinero u material será emplegato ta los ochetibos chenerals de l'asoziazión, u puede dedicar-sen a un serbizio u campaña espezifica d'a tuya triga. En cualsiquier caso, se utilizará esclusibamén en autibidaz á fabor d'o esperanto.
Se puede donar:
A trabiés de transferenzia bancaria u tarcheta de credito a la nuestra cuenta en BBVA 0182-1252-31-0204011961 (IBAN ES85 0182 1252 3102 0401 1961) u en TRIODOS BANK: ES24 1491 0001 2420 0926 4025
Por meyo d'a nuestra cuenta en PayPal, a nombre de HEF - Hispana Esperanto Federacio (Esta dirección de correo electrónico está protegida contra spambots. Necesita activar JavaScript para visualizarla.)
A Federación Española de Esperanto ye una asoziazión de utilidá publica, d'alcuerdo con as lais españolas, e as donazións ta ella tienen abantallas fiscals.
ESPARDE AS NUESTRAS AUTIBIDAZ
Esparde o esperanto e da a conoixer o treballo d'a Federación. Disposamos de folletos e materials informatibos que de buen emplaz podemos meter á disposizión tuya ta labors d'informazión e publizidá. HEF disposa tamién de diberso material ta estar emplegato en esposizións, conferenzias e atras bías d'espardidura. No dandalíes en demandar o material u informazión ta Esta dirección de correo electrónico está protegida contra spambots. Necesita activar JavaScript para visualizarla..
Publizita a nuestra pachina web http://www.esperanto.es. Tamién os nuestros espazios en os retes sozials (Facebook, Twitter, Google+, u a nuestra canal en Youtube) merixen estar siguitos e esparditos.
Informa a os tuyos amigos, os tuyos roldes, e tamién a atros simpatizans de l'idioma u á fablans que no mantienen una relazión constán con o mobimiento organizato, pero que podrían estar interesatos en a espardidura e lo conoiximiento d'o esperanto.
E no dandalíes en gritar-nos u escribir-nos si deseyas simplamén saber bella cosa más sobre a nuestra asoziazión u proposar l'aduya tuya. Estaremos encantaus de contar con a tuya colaborazión.
LA ANTAŬENIGO DE ESPERANTO ESTAS NIA CELO