O esperanto en 10 menutos, ta nabatiadors

I hai muita chen que no'n tien nien siente o menister de biachear ta o estranchero u aprender atro idioma. En i hai tamién atros que, forzaus per as zercunstanzias, son bilingües, trilingües u asabelo-lingües. E son milenta los que han emplegau oras e oras d'o suyo tiempo d'estudeo e libre ta aprender a usar con altubaxo maña bellas d'o milenta de luengas que se charran en o mundo. Lo ideyal sería biachear ta Pekín e charrar en chino; en Oulu, emplegar o finés; e, dimpués, estudear a fundo una luenga polinesia ta pasar dos semanas de total tranquilidá en Vanuatu. Manimenos, una cosa asinas no ye que ta un camatón de saputos que no lis baga nien ta perder o tiempo. Per ixo, a mayoría ha d'acontentar-se en fer-se entender con l'anglés en Amberes, o ruso en Tallin u una mena d'espanglish italianizato en a madrileña Plaza de Cascorro.

Esiste atra posibilidá: estudear una luenga más fazil, que nien sía a luenga maiterna de (cuasi) ningún, e que per tanto cualsiquier interlocutor pueda asumir como propria, sien sentir-se escluyito ni descriminato culturalmén. Ixa luenga ye o esperanto. Aprender-la menesta bel esfuerzo, anque muito menor que en o caso d'as luengas nazionals (per eixemplo, no tiene berbos irregulars ni diferiens conchugazions). Puestar lo millor sía prebar de responder a diez demandas que cualsiquier nabatiador podría fer-se:

1. Cuánta chen lo charra?

En total en i hai 142.857 d'esperantistas. No, fébanos chanza. En beras no se'n sabe, pues no en i hai estadisticas. No ye o mesmo o lumero d'os que lo han estudeato u en tienen conoximientos (millons?) que o d'os que lo charran e lo emplegan asobén (uno u bels zientos de miles?). De todas trazas, caldría una bida a lo Matusalén ta poder charrar con toz els. Per zierto, cuántos donáns de sangre, cuántos interpretes, cuántos xadrezistas u presonas que tocan o piano en i hai en o mundo? ?

2. Ye una secta?

No, e tampoco no un partiu pulitico. O "Jarlibro" (anuario) de "Universala Esperanto-Asocio", con siede en Rotterdam, encluye a su begada informazión sobre asoziazions espezializadas, ya sía de tipo relichioso (tanto d'esperantistas musulmáns como catolicos u cuaqueros pasando per os mormóns, o wonbulismo e mesmo os proprios ateus militáns), pulitica (comunistas, Partiu Radical), zientifica (informatica, ornitolochía, ezetra) u atras (ziegos, radioafezionatos, espeleologos, amáns d'a sauna...).

3. Cuán se "imbentó"?

O primer manual ta aprender esperanto lo publicó Lázaro Zamenhof en 1887 en Bialystok, ziudá güe polaca que alabez pertenexeba a l'imperio d'os zars. L'autor, chodigo rusofablán, oculista de profesión, teneba en ixe inte 27 añadas.

4. Ye artifizial u ye natural?

Ye, como todas as luengas, una creyazión cultural, e en ixe sendito tamién ye artifizial (as parolas no cayen d'os arbres ni surten de bote e boleyo). A esferenzia se alazeta en a suya regularidá e fazilidá, debida a o suyo orichen conszienmén tarabidato. Entre as luengas nazionals i trobamos bels graus de planificazión, dende l'ortografico (coreán, castellán, turco dimpués d'Atatürk) dica operazions d'asentamiento d'a luenga estándar (finés, euskera, ebreu muderno). Ye una luenga natural dende cualsiquier atra ambista (lingüistica, literaria, soziolochica); per ixo no mos ha d'estraniar que o PEN Club Internacional tienga una demba d'escritors esperantistas, u que i aiga grupos de rock que lo han eslechito a la ora de composar as suyas cantas.

5. Tiene esdebenidero?

Profes, anque lo que en beras cuenta ye si tiene presente (se leiga la siguién pregunta).

6. Ta qué sirbe?

Más que más ta paxariquiar u t'aprofeitar o tiempo d'unatro modo con presonas de países e culturas diferiens, ebitando a descriminazión lingüistica e la perda azelerada de neuronas que suposa o estudio indiscriminau de gramaticas e dizionarios. En atras parolas, ta biachear, ta leyer u escribir (literatura traduzida asinas como orichinal, tanto poesía como prosa), ta nabatiar per o rete (que paix ser estau creyato "ex profeso" ta os esperantistas), ta fer amistanzas d'atra mena... En o pasato tamién sirbió ta que endibiduos como Hitler u Stalin lo considerasen a un "elemén perigloso" e lo sacasen d'a zerculazión sien más esplicazions.

7. I hai faltadas en esperanto?

Profes que sí.

8. Ye una luenga europea?

Aparenmén, en o suyo bocabulario, sí lo en ye. A mayoría d'as suyas parolas son comúns a bellas luengas europeas asinas como, per motibos istoricos, t'atras no europeas: "pan" se diz "pan" en chaponés e "pano" en esperanto (pero "reno" se diz "boaco" [boátso], dreitamén d'o lapón). Una luenga que o suyo bocabulario ese estato seleuzionato de todas as luengas esistens, per meyo de cotas, sería inbiable: ta o quechua li corresponderían puestar cinco parolas, ta o gallego atras cinco, ezetra (pero cuáls?). D'atro costau, l'orichen d'o bocabulario d'o esperanto se remunta no ta 1887, sino ta lo d'as fuens etimolochicas suyas. Eixemplo: a parola latina "praecoqua" (u persica praecox), ye dizir "presiego inmaturo", pasa ta o griego (praikókion) e d'iste a l'arabe como "barqúq" u, con articlo, "al-barqúq". D'aquí probienen a forma italiana "albicòcca", a española "albaricoque", a portuguesa "albricoque", l'oczitana "albricòt" e as catalanas "albercoc" e "abercoc". A parola catalana orichinó a franzesa "abricot", posteriormén adotada per bellas luengas europeas, d'entre ellas o esperanto, con "abrikoto" [CHERPILLOD, André: Mil ekzotaj vortoj. Courgenard: l'autor, 1992, 122 p.]. Sin dembargo, a suya gramatica, regular e no guaire complicada, se semella en bels aspeutos a la de bellas luengas asiaticas, como lo chino (que a suya mayor dificultá se limita a l'uso d'ideogramas e ta o feito d'estar un idioma tonal).

9. No suposa una contradizión estar interprete e esperantista de bez?

No, tot lo contrario. Más esclatera que o berbo estar resulta la esprisión "charrar esperanto e treballar d'interprete". En os dos casos se trata de fazilitar a comunicazión, a propria u la d'otri.

Y ta rematar, aquí (en español) puedes bier una cronolochía, dende que lo diseñó Zamenhof. Puedes bier tamién cómo se ha desembolicato en España. Tamién cuán e perqué ye estata considerata una luenga periglosa, a tamas d'a suya relazión con a no violencia, e cómo ye estata balurada dimpués per a UNESCO en bellas resoluzións. Talmén t'interese ya bier cualcosa d'a gramatica e pronunziazión suyas. U saber d'as suyas capazidaz en a creyazión literaria, que esplica una ya dilatada historia. Puedes bier eixemplos de traduzións, u una triga de literatura orichinal, asinas como alparziar bellas menzións a o esperanto en a literatura en español.