Federación Española de Esperanto

Finiĝas la unua aliĝperiodo por la Hispana Kongreso 2020

Atentu! Fine de novembro finiĝas la unua aliĝperiodo, kun reduktita kotizo, por la 79a Hispana Kongreso de Esperanto, kiu okazos inter la 30a de aprilo kaj la 4a de majo 2020 en la urbo Comillas (Kantabrio, norda marbordo de Hispanio, proksime al la urbo Santandero). La kotizo iom kreskos ekde la 1a de decembro, do ne tro prokrastu vian aliĝon, se vi jam decidis kongresi kun ni. Ĉiuj detaloj pri kotizoj kaj aliaj kondiĉoj aperas en la retejo de la Kantabra Esperanto-Asocio.
Cartel del Congreso
La Loka Kongresa Komitato jam publikigis la unuan malneton de la programo, inklude de informoj pri kelkaj el la antaŭvidataj ekskursoj. La akso de la kultura parto estos la rolo de Esperanto kiel ponto, ĉefe per la tradukado de literaturo. Ĉeestos pluraj el la plej gravaj tradukistoj el iberiaj lingvoj al Esperanto. En venontaj semajnoj ni diskonigos pliajn detalojn, kaj vi jam povas legi informojn ankaŭ pri loĝigo, alvenmaniero kaj aliaj praktikaĵoj.

Memoru ankaŭ ke anoj de Hispana Esperanto-Federacio ĝuas rabaton por aliĝo al la Kongreso. Kombine kun la fiskaj avantaĝoj kiujn ĝuas la kotizoj al HEF (ĉar ni estas asocio de publika utileco), povas esti tre konvene por vi aliĝi al la asocio. Tiamaniere vi ankaŭ helpas nian agadon por disvastigo de Esperanto. Ni jam malfermis la aliĝkampanjon por 2020, en kiu ni konservis la ĝisnunajn kotizojn. Aliru la retan formularonskríbu al ni se vi volas koni aliajn detalojn.

Jam aliĝis pli ol 70 homoj. Venu, ni atendas vin!