Federación Española de Esperanto

Alproksimiĝas la 75 Hispana Kongreso de Esperanto, en Ekstremaduro

Hispana Esperanto-Federacio invitas vin partopreni en la 75a Hispana Kongreso de Esperanto, kiu okazos de la 30a de junio ĝis la 4a de julio 2016, en Herrera del Duque, en la regiono Ekstremaduro, sudokcidente de Hispanio.

La kongreso havos kiel bazan motivon la moton “Ekstremaduro: lando de limoj kaj kontaktoj / Extremadura: tierra de fronteras y contactos”. Nome tiu historia regiono estas kontaktejo inter Kastilio kaj Andaluzio, Portugalio kaj Hispanio, krom ties aparta konsisto de diversecaj areoj. La Kongreso ricevis sponsoran apogon de la Fondumo de la Kulturo Ekstremadura (ligita al la regiona registaro) kaj de la provincaj kaj urbaj aŭtoritatoj.cartel del 75 Congreso de Esperanto en Herrera del Duque

Herrera del Duque estas urbeto kun iom malpli ol 4.000 enloĝantoj. La urbo konservas pitoreskan rurvilaĝan centron, kaj ĉirkaŭe estas naturaj vidindaĵoj kaj montaraj kaj strandaj. Fakte Herrera estas inter du gravaj diglagoj nome Cíjara kaj García de Sola, kie eblas naĝado, sunbanado kaj akvosportoj. Proksime estas grava kolonio de gipoj kaj teritorio de aliaj gravaj birdoj kiaj nigra cikonio, agloj ktp., krom mamuloj kiaj cervoj, aproj kaj aliaj.

La duan fojon la HKE okazas en la regiono, kie en 1992 ĝi okazis precize en ties ĉefurbo Merido. Tiam kreiĝis la Iberia Skolo, kiu nun povas reveni al la naskoloko.

La baza sidejo de la kongreso estos la Kultura Palaco de Herrera del Duque, moderna konstruaĵo, kiu disponas je ĉiuj necesaj eroj por la okazigo de la kongreso: salonoj, kunvenĉambroj, ripozejoj, kaj luksega teatro kaj spektaklejo. La loĝeblecoj gamos inter la senpaga junulargastejo de la apuda submunicipo Peloche, intermeza kampadejo kaj la hoteloj de Herrera. La LKK informos pri ĉiuj ebloj, transporto el la junulargastejo kaj prezoj en hoteloj; same povos peri la rezervojn por eksterlandaj kongresanoj.

Kongresejo, Kulturpalaco en Herrera del Duque

La detaloj pri la programo aperas en tiu ĉi paĝo. Ĝi estas ege riĉa, el kultura, kleriga, distra kaj turisma vidpunkto. Jam jam la antaŭan tagon, la 29-an de junio, eblos veni al Herrera, por ĉeesti trejnan Seminarion por aktivuloj, kunorganizitan de Universala Esperanto-Asocio.

Por homoj kiuj unuafoje ĉeestas esperantistan kongreson aŭ renkonton, kaj speciale tiuj lernintaj per la reto, oni organizis specialan kunvenon dum la unua tago, la ĵaŭdo 30-a de junio, je la 16,30, por ke ili povu konatiĝi kun la esperanta komunumo, kaj tiel povu profiti pli la eventon kaj la etoson.

Dum la tagoj antaŭ la kongreso, estis organizitaj ankaŭ diversaj aktivaĵoj en Madrido, por vizitantoj kiuj trairas la ĉefurbon por direktiĝi al Herrera. Inter ili estis organizita formala prezentado de la kongreso la lundon 27-an de junio je la 20,00 horo en ekstremadura institucio, la Agrupación Extremeña de Alcorcón, tre facile alirebla el la centro de la ĉefurbo.

Ankraŭ eblas aliĝi al la Kongreso. Vidu la kondiĉojn kaj intrukciojn en tiu ĉi ligilo (pdf) aŭ en tiu ĉi reta formularo. Jam aliĝis 150 homoj, el 4 kontinentoj!

Pliajn utilajn informojn, inklude de transporto, gastigado, ekskursoj, ktp, trovi en tiu ĉi paĝo.

Kaj oni povas plu informiĝi pri la Hispanaj kongresoj de Esperanto kaj spekti iujn videojn pri pasintaj renkontiĝoj en tiu ĉi paĝo.