Federación Española de Esperanto

Publikigita la provizora programo de la Hispana Kongreso de Esperanto

La organizantoj de la venonta Hispana Esperanto-Kongreso, la grupo "Liberanimo", akurate daŭrigas la pretigon de la programo kaj la necesaj organizaj aktivadoj. Memoru ke ĝi okazos fine de junio en la urbo Teruel (Teruelo, regiono Aragono)

Vi povas jam trovi en nia retejo la provizoran programon en la adreso de la kongreso. Ĝi estas tre kompleta kaj varia, kaj ĝi entenas ekspoziciojn (pri Esperanto kaj pri Francisco Azorín), muzikajn koncertojn (de Kajto, kiu rekuniĝos kvarope okaze de sia 30a datreveno, de Martin Wiese, kaj de lokaj artistoj), prelegojn, astronomian observadon, kunvenojn, turismajn vizitojn kaj multajn aliajn aktivadojn.

La kongreso mem okazos inter la 23a kaj 25a de junio, sed jam dum la antaŭaj kaj postaj tagoj vi povos ĝui la esperantistan etoson. Oni antaŭvidas renkonton por komencantoj kaj turisman viziton la antaŭan tagon, 22an de junio. Seminario por aktivuloj la 26an kaj 27an kompletigos la aktivadojn por tiuj kiuj povos resti por ĝui la urbon.afisxoHK76e

La pasintan 3an de marto, la prezidanto de la LKK, Alberto Granados, kaj la prezidanto de HEF, José Antonio del Barrio, prezentis al la lokaj amaskomunikiloj la bazajn liniojn de la Kongreso. La novaĵo estis publikigita en la tri ĉefaj lokaj kaj regionaj ĵurnaloj, Diario de Teruel, Heraldo de Aragón kaj El Periódico de Aragón, kaj ambaŭ estis intervjuitaj en la radiostacioj Cadena Ser kaj Radio Nacional de España en Teruelo. Oni anoncis tie ke la urbestrino de Teruelo inaŭguros la kongreson vendrede vespere, kaj ke sabate matene oni atribuos la nomon “placo de Esperanto” al spaco en la urbo. 

Aldone, dum la kongreso oni organizos la parolan parton de la monda sesio de ekzamenoj de Esperanto laŭ la Komuna Eŭropa Referenckadro (KER), kiun la organizaĵo edukado.net, kun apogo de Universala Esperanto-Asocio, kunvokis por la monato junio. Laŭ tiu ĉi modelo, la skriba kaj parola partoj estas aparte organizataj. Por la 10a de junio oni programis la skriban ekzamenon samtempe en diversaj urboj de la mondo. Unu el la sidejoj estos Zaragozo, kien povos vojaĝi ĉiuj interesitoj (ankoraŭ eblos organizi ĝin ankaŭ en aliaj urboj, se ariĝas sufiĉa nombro da interesatoj). La komuna parola parto okazos la 24an de junio en Teruelo. Por pliaj informoj pri tiu vizitu la retejon: http://edukado.net/ekzamenoj/ker; interesatoj kaj kandidatoj, bv. skribi al la adreso Esta dirección de correo electrónico está protegida contra spambots. Usted necesita tener Javascript activado para poder verla..

La 21an de junio oni organizos publikan prezentadon de la Kongreso en Madrido, en la regiona kultura institucio "Casa de Aragón", kaj el tie oni verŝajne organizos komunan vojaĝon. Tiuj personoj alvenantaj el aliaj landoj, tra Valencio aŭ Barcelono, povas skribi al la Federacio por ke ni metu ilin en kontakto kun lokaj esperantistoj, por organizi aktivadon aŭ viziton al la koncerna urbo, kaj por faciligi komunan vojaĝon al Teruelo, se eble.

Ni rememorigas ke, krom la Jaron Zamenhof, ni kunmemoras en tiu ĉi jaro la 800-jaran datrevenon de la legendo de la Geamantoj de Teruelo. Tiu ĉì estos kongreso de amantoj… amantoj de Esperanto.

Pliaj informoj http://www.esperanto.es/kongreso. Kaj por aliĝi: http://www.esperanto.es/kongresaligo.

Inaŭguro de la Jaro Zamenhof en Hispanio

Hispana Esperanto-Federacio komencis en februaro la celebradon de la Jaro Zamenhof, la kunmemoro de la datreveno de la morto de D-ro Lazaro Zamenhof, la iniciatinto de la internacia lingvo Esperanto, agnoskita de UNESKO, la organizaĵo de Unuiĝintaj Nacioj por edukado, kulturo kaj scienco.

La formala inaŭguro okazis la 9-an de februaro, Presentación Año Zamenhof Vallecasen la Publika Biblioteko de la kvartalo Vallecas, kie situas la t.n. Centro de Pola Kulturintereso de Madrido (loko por elmontrado de la kulturo de la komunumoj de enmigrintoj en la regiono). En la prezentado partoprenis la direktorino de la Biblioteko, la nova direktorino de la Pola Instituto pri Kulturo en Madrido, kiu montris la apogon de la institucio al la agado de la esperantistoj, kun la prezidanto de Hispana Esperanto-Federacio kaj la direktoro de Fondumo Esperanto. Oni kompletigis la prezenton per gvidata vizito al la ekspozicio pri Esperanto montrata en la halo de la Biblioteko.

La ekspozicio vojaĝos poste al Cheste (Valencio), urbo kun granda tradicio rilate al Esperanto, kie ĝi estos montrata de la 3a ĝis la 16a de marto. Ni planas pliajn ekspoziciojn dum tiu ĉi jaro en aliaj urboj, kaj do ni sugestas al la grupoj kaj individuaj aktivuloj kontakti instituciojn por proponi tiun ĉi iniciaton.

Iom antaŭe, la 2an de februaro, la prezidanto de la Federacio, José Antonio del Barrio, prelegis pri Dro. Zamenhof, lia verko kaj ideoj en la Centro Sefarad-Israel, institucio kreita de la Ministerio pri Eksterlandaj Aferoj por flegi la rilatojn kun la juda kulturo, kaj kiel sidejo troviĝas en historia palaco en la strato Mayor de Madrido. Kiel sekvo li estis poste intervjuita en radio rilata al la juda kulturo por hispanlingvanoj, Radio Sefarad.

Dum tiuj ĉi tagoj ni ricevis la konfirmon de alia tre interesa atingo: la hispana organizaĵo por blinduloj, la ONCE, dediĉos unu el la biletoj de la tre fama loterio ("cupón"), tiun de la 12a de aŭgusto ĉijara, al la figuro de Dro. Zamenhof.

Dum la venontaj semajnoj ni plu informos pri la detaloj de la agadoj antaŭvidataj. Sekvu niajn informojn en la sociaj retejoj aŭ abonu nian Bitbultenon por resti informita. Kontaktu kun HEF por koni la detalojn, kaj ankaŭ por kunlabori en la organizado de aliaj iniciatoj por omaĝi tiun ĉi grandan figuron de la homaro kaj disvastigi liajn verkojn, liajn ideojn kaj la lingvo de li lanĉita.

Unesco y centenario de Zamenhof

 

Más Artículos...

Las cookies nos permiter ofrecer nuestros servicios. Si continuas navegando, aceptas el uso que hacemos de la cookies. --- Kuketoj ebligas al ni oferi niajn servojn. Se vi eniras nian paĝaron, vi akceptas tion.
Para saber más sobre las cookies lea nuestra / por scii pli pri la kuketoj legu nian política de privacidad / protokolon pri privateco .

  Acepto las cookies en este sitio. Mi akceptas la kuketojn.
EU Cookie Directive Module Information